Alternatiba sozioekonomikoaren aurkezpena

Alternatibak, Aralarrek, EAk eta ezker abertzaleak beren proposamen sozioekonomikoa aurkeztuko dute larunbatean, EHUren Bilboko Paraninfoan.

Ezkerreko lau alderdi soberanistek azpimarratu dute badagoela irtenbidea Bizkaia jasaten den krisi ekonomiko eta sozialetik ateratzeko, eraldaketa sozialean eta burujabetzan oinarritutako irtenbidea.

Alternatibak, Aralarrek, Eusko Alkartasunak eta ezker abertzaleak larunbat honetan egingo dute proposamen sozioekonomikoaren aurkezpen publikoa. Proposamen horretan jasotzen dira Euskal Herriak bizi duen “krisi ekonomiko, sozial eta baloreetako larritik irteteko irizpideak eta ideiak”. Aurkezpen publikoa EHUren Bilboko Paraninfoan egingo da, eta bertan lau alderdietako ordezkariek parte hartuko dute.

Ezkerreko lau indar soberanistek uste dute badela irtenbidea bizi dugun krisi egoeratik irteteko, baina irtenbide hori ez dela etorriko “ezartzen ari diren austeritate neurriekin edo urteetan, borroka sozialaren bitartez, lortu diren eskubide sozial eta laboralen murrizketen bitartez”. Horretarako, administrazio ezberdinek ezarri dituzten politika sozial eta ekonomikoen alternatiba izango den proposamena landu eta praktikan ipini beharra dagoela uste dute, eta horretara dator prestatu duten Proposamen Sozioekonomikoa. Proposamen hori hainbat eragile sozial eta ekonomikorekin partekatzen ari dira, haien ekarpenak jasotzeko helburuarekin.