kirruli kultur elkartea

Ikurriñari omenaldia eta kalejira berdea

Aurten ere independentziaren aldarrikapenak bere tokia izan du Bilboko Aste Nagusian. Atzo jendetza handia bildu zen Arriagan arratsaldeko 18:30etan Bilboko Konpartsek antolatutako IKURRIÑARI OMENALDIAn parte hartzeko. Independentistak Sareak bat egin zuen omenaldiarekin eta zapi berdeak eta bandera independentistak ugari izan ziren Arriaga inguruan.

Omenaldia hasi baino minuto batzuk lehenago Sareko kideek “independendentzia” jartzen zuen pankarta handia jarri zuten ondoko eraikin batean, eta omenaldian, ikurriña mastan gora altzatu ahala, etengabe entzun ziren “independentzia” oihuak.

Omenaldia amaitu bezain laster, Independentistak Sarearen KALEJIRA BERDEA hasi zen. Jende askok hartu zuen parte eta kalejirak manifestaldia ematen zuen. Areatzan eta Alde Zaharrean zehar egin zuen bere ibilbidea eta, musika eta dantzarekin batera, independentziaren aldeko aldarrikapena eraman zuen jaigunera.

Independentistak Saretik zorionak Bilboko independentistei, eta parte hartu zuten herritar guztiei, ekimenak izan zuen arrakastagatik eta herriz-herri hedatzen ari garen olatu berdea nabarmen agertu delako Bilboko Aste Nagusian ere.

2012ko abuztuak 24

INDEPENDENTISTAK Sarea