Santi Brouard eta Josu Muguruza gogoan

Datorren asteartean, azaroak 20, 28 eta 23 urte beteko dira, hurrenez hurren, Santi Brouard eta Josu Muguruza, gure lagun eta burkideak hil zizkigutenetik. Guretzako balio emozional, sinboliko zein politikoz beteriko data horretan, urtero egiten dugun moduan, Santi eta Josu Ezker Abertzaleko militanteak omenduko ditugu.

Azaroaren 20ean, Santi eta Josu omenduko ditugu. Eurak, eta euren figurak ordezkatzen duten guztia omenduko ditugu: Euskal Herriarekiko konpromisoa eta maitasuna, konpromiso eta koherentzia militantea, Ezker Abertzalearen baitan eginiko ekarpen oparo eta ezinbestekoa.

Ezinezkoa zaigu, halaber, Santi eta Josu oroitu eta omentzeko antolatuko ditugun ekitaldiak Euskal Herrian bizi dugun testuinguru politikotik bereiztea. Izan ere, urtebete bete berri da Aieteko Nazioarteko Konferentziatik eta ETAren erabaki historikotik.

Abagune berri batean aurrean da gure herria: Justizian eta eskubide guztien aitortzan oinarrituriko bake agertoki bat eraikitzeko aukera ireki da parez pare. Eta aukera hori irekitzea ezinezkoa litzateke Santi eta Josuren moduan, euren ekarpen humano, politiko eta militantea burutu duten milaka lagunen borrokarik gabe.

Horrela bada, astearte goizean, urtero bezala burutuko ditugun lore eskaintzetan honakoa omendu nahi dugu: bakea eta askatasuna eraikitzea ahalbidetu duen ekarpen militantea.

Datorren asteartean lore eskaintza burutuko da goizean:

- 12:00tan Ametzola parkean, Santi Brouarden monolitoan
- 12:30tan Errekaldeko Plazan, Josu Muguruzaren monolitoan

Arratsaldez, Egiari Zor Fundazioak zazpi t'erditan Esperantza frontoian ekitaldia burutuko du.